لاہورسےکراچی جانےوالی شالیمارایکسپریس حادثے کا شکار

لاہور سے کراچی جانے والی شالیمار ایکسپریس ٹرین خانیوال لوکو شیڈ کے قریب ایک بڑے حادثے کا شکار ہونے سے بال بال بچ گئی۔ ٹرین کی ایک بوگی پٹری سے اترنے کے باعث اپ اور ڈاؤن ٹریکس پر ٹرینوں کی آمد و رفت عارضی طور پر معطل ہو گئی۔

تفصیلات کے مطابق، حادثہ اس وقت پیش آیا جب شالیمار ایکسپریس کی ٹرالی کے ویل (پہیے) سے ریل کا پہیہ نکل کر دوسری بوگی سے جا ٹکرایا۔ اس زوردار جھٹکے کے نتیجے میں ٹرین کی بوگی پٹری سے نیچے اتر گئی۔ خوش قسمتی سے اس وقت ٹرین کی رفتار کم تھی، جس کی وجہ سے معجزانہ طور پر کوئی جانی نقصان نہیں ہوا اور تمام مسافر محفوظ رہے۔

حادثے کی اطلاع ملتے ہی ریلوے انتظامیہ اور ملازمین کی بھاری نفری فوری طور پر موقع پر پہنچ گئی۔ ریسکیو آپریشن کے دوران شالیمار ایکسپریس کی 5 بوگیاں الگ کر کے خانیوال ریلوے اسٹیشن پہنچا دی گئیں، جبکہ امدادی عملہ ٹرین کو ٹریک پر بحال کرنے کی کوششوں میں مصروف ہے۔ انتظامیہ کے مطابق ریلیف ٹرین کی آمد کے بعد اپ اور ڈاؤن ریلوے ٹریک کو مکمل طور پر بحال کر دیا جائے گا۔ اس موقع پر وزیر ریلوے کا کہنا تھا کہ صرف پٹرولیم مصنوعات کی قیمتیں کم ہونے سے ٹرین کے کرایوں میں کمی ممکن نہیں ہے، کیونکہ ریلوے کے دیگر انتظامی اور تکنیکی اخراجات بھی اس سے جڑے ہوئے ہیں۔