وزیراعظم شہباز شریف ویانا میں آسٹرین چانسلر پہنچ گئے، پرتپاک استقبال، گارڈ آف آنر پیش

ویانا، آسٹریا: وزیراعظم شہباز شریف ویانا میں آسٹرین چانسلری پہنچے، جہاں ان کا پرتپاک استقبال کیا گیا اور انہیں گارڈ آف آنر پیش کیا گیا۔

آسٹریا کے چانسلر کرسچن سٹاکر نے وزیراعظم کا چانسلری پہنچنے پر استقبال کیا، خوش آمدید کہا اور ان کا تعارف اپنی کابینہ کے ارکان سے کروایا۔ وزیراعظم نے چانسلری پہنچنے پر مہمانوں کی کتاب میں اپنے تاثرات بھی درج کیے۔

قبل ازیں وزیراعظم شہباز شریف نے چین کے نئے سال پر چینی صدر شی جن پنگ اور چینی عوام کے لیے نیک خواہشات کا اظہار کیا۔ اپنے تہنیتی پیغام میں انہوں نے کہا کہ نیا سال پاکستان اور چین کے درمیان دوستی اور باہمی تعاون کو مزید مضبوط بنائے گا۔

وزیراعظم نے چینی عوام کی صحت، کامیابی اور خوشحالی کے لیے نیک تمناؤں کا اظہار کرتے ہوئے کہا کہ پاکستان اور چین کا تعلق ہمیشہ مضبوط رہا ہے اور آئندہ بھی مزید مستحکم ہوگا۔