شہباز شریف اور شیخ بن زاید النہیان کی ملاقات، دو طرفہ تعلقات پر تبادلہ خیال

وزیراعظم شہباز شریف اور متحدہ عرب امارات کے صدر شیخ بن زاید النہیان کے درمیان ملاقات ہوئی، جس میں دونوں رہنماؤں نے پاکستان اور یو اے ای کے دوطرفہ تعلقات کے مختلف پہلوؤں پر تبادلہ خیال کیا۔

ملاقات میں دونوں ممالک کی دیرینہ شراکت داری کو مزید مستحکم بنانے پر گفتگو کی گئی اور مختلف شعبوں میں جاری تعاون پر پیشرفت کا جائزہ لیا گیا۔ وزیراعظم اور صدر یو اے ای نے سرمایہ کاری، توانائی، آئی ٹی اور دیگر شعبوں میں تعاون کو وسعت دینے کی اہمیت پر زور دیا۔

دونوں رہنماؤں نے دوطرفہ تجارت میں اضافے کی ضرورت پر بھی اتفاق کیا۔ ملاقات کے دوران علاقائی اور بین الاقوامی امور پر بھی تفصیلی تبادلہ خیال ہوا۔

پاکستان اور یو اے ای کی قیادت نے دوطرفہ تعلقات کی مثبت سمت پر اطمینان کا اظہار کرتے ہوئے امن، استحکام اور پائیدار ترقی کے مشترکہ اہداف کے لیے قریبی تعاون جاری رکھنے کے عزم کا اعادہ کیا۔