گلگت بلتستان انتخابات:پی ٹی آئی کے سوا باقی جماعتوں کو انتخابی مہم کی اجازت ہے، شفیع جان

تحریک انصاف کے رہنما شفیع جان نے کہا ہے کہ گلگت بلتستان میں ان کی جماعت کے علاوہ دیگر تمام سیاسی جماعتوں کو انتخابی مہم چلانے کی مکمل اجازت حاصل ہے، جن میں مسلم لیگ (ن) اور پاکستان پیپلز پارٹی بھی شامل ہیں جو آزادانہ طور پر اپنی انتخابی سرگرمیاں جاری رکھے ہوئے ہیں۔

انہوں نے کہا کہ اگر تحریک انصاف سے تعلق رکھنے والا کوئی وزیر یا عہدیدار اس صورتحال میں ہوتا تو الیکشن کمیشن فوری طور پر ایکشن لے چکا ہوتا، لیکن موجودہ خاموشی سوالات کو جنم دے رہی ہے۔

شفیع جان کے مطابق تحریک انصاف نے گلگت بلتستان ڈیموکریٹک موومنٹ سے اتحاد کیا تھا جسے بعد میں ختم کر دیا گیا، اور ان کے امیدواروں کو آزاد قرار دے دیا گیا۔

ان کا کہنا تھا کہ گلگت بلتستان کے عوام اپنا فیصلہ کر چکے ہیں اور 7 جون کو تحریک انصاف کامیابی حاصل کرے گی۔ انہوں نے مزید کہا کہ ووٹ کے تحفظ کے لیے ایک مؤثر نظام پر کام جاری ہے۔

شفیع جان نے الزام عائد کیا کہ فارم 47 کی طرز پر ایک اور منصوبہ بنایا جا رہا ہے جسے کسی صورت قبول نہیں کیا جائے گا، اور اگر ضرورت پڑی تو گلگت بلتستان میں احتجاجی لاک ڈاؤن بھی کیا جا سکتا ہے۔