روس اور امریکا کے درمیان حل طلب معاملات پر رابطے جلد ہونگے: سرگئی لاوروف

روس کے وزیر خارجہ سرگئی لاوروف نے کہا ہے کہ روس اور امریکا کے دوطرفہ تعلقات میں موجود حل طلب اور اختلافی معاملات پر دونوں ممالک کے درمیان رابطے جلد متوقع ہیں، اور اس سلسلے میں ملاقات کے وقت اور مقام کا تعین کیا جا رہا ہے۔

ماسکو ریجن کے شہر استرا (Istra) میں والڈائی ڈسکشن کلب کے 23ویں سالانہ اجلاس کے موقع پر میڈیا کے نمائندوں سے گفتگو کرتے ہوئے سرگئی لاوروف نے وضاحت کی کہ اس معاملے پر اگرچہ باضابطہ رابطہ ابھی نہیں ہوا، تاہم دونوں فریق اعلیٰ سطح پر ملاقات کے امکان پر متفق ہیں۔

روسی وزیر خارجہ کا کہنا تھا کہ امریکی وزیر خارجہ مارکو روبیو کے ساتھ ہونے والی بات چیت کے دوران اس بات پر اتفاق ہوا تھا کہ دونوں ممالک کے خصوصی نمائندے دوطرفہ تعلقات کے تمام اختلافی اور پیچیدہ امور پر آپس میں رابطہ قائم کریں گے۔ سرگئی لاوروف کے مطابق، اب روسی اور امریکی ماہرین باہم مل کر ان مجوزہ رابطوں اور ملاقاتوں کے لیے مخصوص تاریخوں اور مقام کو حتمی شکل دے رہے ہیں، جو کہ مستقبل قریب میں ہی منعقد ہوں گے۔