سینیٹر پلوشہ خان نے علیم خان کو بھارتی نتیش کمار سے تشبیہ دے دی

سینیٹر پلوشہ خان نے پارلیمنٹ کے باہر میڈیا سے گفتگو کرتے ہوئے وفاقی وزیر علیم خان کو بھارتی سیاستدان نتیش کمار سے تشبیہ دی۔ انہوں نے کہا کہ کمیٹی اجلاس میں ان کے ساتھ روا رکھا گیا رویہ ناقابل قبول ہے اور اس حوالے سے انہوں نے باقاعدہ طور پر استحقاق کمیٹی میں درخواست جمع کرا دی ہے۔

پلوشہ خان کا کہنا تھا کہ کمیٹی کسی کا بیڈ روم نہیں بلکہ ایک باوقار فورم ہے جہاں شائستگی اور احترام لازم ہے۔ انہوں نے کہا کہ وزیراعظم شہباز شریف کو اپنی کابینہ کو یہ بات سمجھانی چاہیے کہ پاکستان میں ایسے رویے برداشت نہیں کیے جائیں گے۔

انہوں نے الزام عائد کیا کہ علیم خان ماضی میں بانی پی ٹی آئی کی اہلیہ بشریٰ بی بی پر بھی الزامات لگا چکے ہیں، اور ان کا طرزِ سیاست بھارتی نتیش کمار سے مشابہت رکھتا ہے۔ سینیٹر پلوشہ خان نے واضح کیا کہ ان کی ذات پر کرپشن کا کوئی الزام ثابت نہیں کیا جا سکتا اور اگر کسی کے پاس ثبوت ہیں تو سامنے لائے۔