جمہوریت کو ری بوٹ کرنے کی ضرورت، نئی ٹیم کوکارکردگی دکھانا ہوگی: فیصل واوڈا

آزاد سینیٹر فیصل واوڈا نے ملک کی سیاسی اور انتظامی صورتحال پر سخت تشویش کا اظہار کرتے ہوئے کہا ہے کہ پاکستان میں جمہوریت کو ‘ری بوٹ’ کرنے کی شدید ضرورت ہے اور خیبر پختونخوا میں قائم نئی انتظامی ٹیم کو ہر صورت 180 دن کے اندر اپنی کارکردگی ثابت کرنا ہوگی۔

ایک نجی ٹی وی شو میں گفتگو کرتے ہوئے فیصل واوڈا نے کہا کہ وہ اپنی پریس کانفرنس کے ایک ایک لفظ پر مکمل قائم ہیں۔ پاکستان اور اس کی سلامتی کے خلاف بات کرنے والوں کو سخت نتائج کا سامنا کرنا پڑے گا کیونکہ کوئی بھی صوبہ یا خطہ کسی فرد یا سیاسی جماعت کی ذاتی جاگیر نہیں ہے۔ انہوں نے کہا کہ نام نہاد گندی جمہوریت کی وجہ سے مسائل پیدا ہوئے؛ ایک طرف غریبوں کے بچے کھلے گٹروں میں گر کر جاں بحق ہو رہے ہیں تو دوسری طرف جمہوریت کے نعرے لگائے جاتے ہیں، تاہم نظام کو درست کر کے اچھی جمہوریت قائم کی جا سکتی ہے۔

سینیٹر فیصل واوڈا نے مزید کہا کہ جمہوریت کو ری بوٹ کرنے کا مقصد پورے نظام کی اصلاح اور کارکردگی پر مبنی گورننس کا قیام ہے۔ خیبر پختونخوا میں نئی انتظامی و حکومتی ٹیم کے پاس ناکامی کا کوئی موقع نہیں؛ اگر 180 دن میں نتائج نہ ملے تو اس سے بہتر لوگ سامنے لائے جائیں گے۔ انہوں نے دعویٰ کیا کہ پی ٹی آئی پر پابندی کی بات انہوں نے پہلے ہی کی تھی جو جلد سچ ثابت ہو سکتی ہے۔ اس کے ساتھ ہی انہوں نے صوبائی ایڈمنسٹریشن سے وابستہ سہیل آفریدی کی نااہلی کا عمل شروع ہونے کا دعویٰ بھی کیا۔