پیٹرول زیادہ مہنگا ہونے کہ وجہ 117 روپے فی لیٹر لیوی کا نفاذ ہے، حکام پیٹرولیم ڈویژن

سینیٹ کی قائمہ کمیٹی برائے پیٹرولیم کے اجلاس میں پیٹرولیم مصنوعات کی قیمتوں اور ذخائر کے حوالے سے اہم انکشافات سامنے آئے ہیں۔ اجلاس کے دوران پیٹرولیم ڈویژن حکام نے بتایا کہ پیٹرول کی قیمتوں میں بڑے اضافے کی بنیادی وجہ 117 روپے فی لیٹر پیٹرولیم لیوی کا نفاذ ہے۔ وزیر پیٹرولیم علی پرویز ملک نے رکن کمیٹی سیف اللہ ابڑو کے سوالات کا جواب دیتے ہوئے تمام 42 آئل مارکیٹنگ کمپنیوں (OMCs) کا آڈٹ کرانے کا اعلان کیا ہے تاکہ قیمتوں میں اضافے اور اسٹاکس کی صورتحال واضح ہو سکے۔ حکام نے مزید بتایا کہ یکم مارچ کے بعد عالمی مارکیٹ میں تیل کی قیمتوں میں غیر معمولی اضافے اور ملک میں اسٹریٹیجک اسٹاک کی عدم موجودگی کے باعث مہنگا تیل خریدنا پڑا، جس کا بوجھ صارفین تک منتقل ہوا۔ وفاقی وزیر نے یقین دہانی کرائی کہ اس معاملے کی تحقیقات ایف آئی اے بھی کر رہا ہے اور تمام متعلقہ ڈیٹا کمیٹی کو فراہم کر دیا جائے گا۔