بلوچستان میں سکیورٹی فورسز کی کارروائیاں، 96 گھنٹوں میں 71 سے زائد دہشتگرد ہلاک

بلوچستان میں ملک دشمن عناصر اور غیر ملکی سرپرستی میں سرگرم دہشتگردوں کے خلاف سکیورٹی فورسز کا آپریشنز کا سلسلہ پوری عزم کے ساتھ جاری ہے۔ پاک فوج کے شعبہ تعلقات عامہ (آئی ایس پی آر) کے مطابق، فورسز نے صوبے کے مختلف علاقوں میں کارروائیاں کرتے ہوئے بھارتی حمایت یافتہ اور فتنہ الخوارج سے تعلق رکھنے والے 71 سے زائد دہشتگردوں کو جہنم واصل کر دیا ہے۔

آئی ایس پی آر کا بتانا ہے کہ کوئٹہ کے علاقے شابان میں سکیورٹی فورسز نے ایک کامیاب انٹیلی جنس بیسڈ آپریشن کے دوران اب تک 33 بھارتی سرپرستی میں سرگرم دہشتگردوں کو ہلاک کیا ہے۔ اس کارروائی کے دوران سکیورٹی فورسز نے دہشتگردوں کے متعدد خفیہ ٹھکانوں کو مکمل طور پر کلیئر کر دیا، اور موقع سے بڑی تعداد میں جدید اسلحہ، گولہ بارود اور خطرناک دھماکا خیز مواد بھی برآمد کیا گیا۔

فوجی ترجمان کے مطابق، صرف گزشتہ 72 گھنٹوں کے دوران کیے جانے والے مختلف آپریشنز میں 23 دہشتگردوں کو ہلاک کیا گیا، جبکہ نوشکی اور مند میں کی جانے والی کارروائیوں میں بھی بھاری مقدار میں اسلحہ قبضے میں لیا گیا۔ مجموعی طور پر گزشتہ 96 گھنٹوں کے دوران بلوچستان میں چلائی جانے والی کارروائیوں کے نتیجے میں ہلاک ہونے والے دہشتگردوں کی تعداد 71 سے تجاوز کر گئی ہے۔

آئی ایس پی آر نے واضح کیا ہے کہ ان کارروائیوں کے نتیجے میں مقامی آبادی کو فتنہ الخوارج اور نام نہاد فتنہ الہندوستان کے خطرات سے بڑی حد تک نجات دلائی گئی ہے، اور شابان سمیت دیگر علاقوں میں ہونے والی کارروائیوں سے بھارتی حمایت یافتہ افغان پراکسیز کو کاری ضرب لگی ہے۔ سکیورٹی فورسز کا عزم دہرایا گیا ہے کہ دہشتگردی کے خلاف یہ جنگ ریاست کے وژن ’’عزمِ استحکام‘‘ کے تحت ملک سے غیرملکی معاونت یافتہ دہشتگردی کے مکمل خاتمے تک پوری قوت سے جاری رہے گی۔