قلات :سیکیورٹی فورسز کا فتنۃ الہندوستان کیخلاف آپریشن، 8 دہشتگرد ہلاک

پاک فوج کے شعبہ تعلقات عامہ (آئی ایس پی آر) کے مطابق بلوچستان کے ضلع قلات میں سیکیورٹی فورسز نے فتنۃ الہندوستان کے خلاف انٹیلی جنس بنیادوں پر کارروائی کرتے ہوئے 8 دہشت گرد ہلاک کر دیے۔

آپریشن 24 دسمبر کو بھارتی پراکسی دہشت گردوں کی موجودگی کی اطلاع پر کیا گیا۔ کارروائی کے دوران دہشت گردوں کے ٹھکانے کو مؤثر انداز میں نشانہ بنایا گیا اور شدید فائرنگ کے تبادلے کے بعد دہشت گرد جہنم واصل ہوئے۔ ہلاک دہشت گردوں کے قبضے سے اسلحہ، گولہ بارود اور دھماکا خیز مواد بھی برآمد ہوا۔

ترجمان پاک فوج کے مطابق یہ دہشت گرد علاقے میں متعدد دہشت گردانہ کارروائیوں میں سرگرم تھے۔ علاقے میں دیگر بھارتی حمایت یافتہ دہشت گردوں کے خاتمے کے لیے کلیئرنس اور سرچ آپریشنز جاری ہیں۔

آئی ایس پی آر کا کہنا ہے کہ قومی ایکشن پلان کے تحت وفاقی ایپکس کمیٹی سے منظور شدہ وژن ’’عزمِ استحکام‘‘ کے مطابق سیکیورٹی فورسز اور قانون نافذ کرنے والے ادارے غیر ملکی سرپرستی میں ہونے والی دہشت گردی کے مکمل خاتمے تک انسدادِ دہشت گردی کی کارروائیاں جاری رکھیں گے۔