میرپورخاص ڈویژن کے تین اضلاع میں 15 روز کے لیے دفعہ 144 نافذ

کمشنر میرپورخاص ڈویژن نے خطے میں امن و امان کی صورتحال برقرار رکھنے اور عوامی نظم و ضبط کو یقینی بنانے کے لیے میرپورخاص، عمرکوٹ اور تھرپارکر میں 15 روز کے لیے دفعہ 144 نافذ کرنے کا باضابطہ نوٹیفکیشن جاری کر دیا ہے۔

جاری کردہ نوٹیفکیشن کے مطابق تینوں اضلاع میں پانچ یا اس سے زائد افراد کے اکٹھے ہونے، ہر قسم کے احتجاج، مظاہروں اور ریلیوں کے انعقاد پر مکمل پابندی عائد کر دی گئی ہے، جبکہ کسی بھی ہنگامی نوعیت کے اجتماع کے لیے انتظامیہ سے پیشگی اجازت لینا لازمی ہوگا۔ نوٹیفکیشن میں سڑکوں کی ناکہ بندی کرنے، راستے بند کرنے اور ٹریفک کی روانی میں خلل ڈالنے پر بھی سخت قدغن لگائی گئی ہے۔ اس کے علاوہ اسلحہ، گولہ بارود، لاٹھیاں اور دیگر مہلک اشیا کی نمائش پر مکمل پابندی رہے گی۔

ڈویژنل انتظامیہ کی جانب سے جاری احکامات میں اشتعال انگیز تقاریر، نفرت انگیز نعرے بازی اور سوشل میڈیا پر ایسا مواد پوسٹ یا شیئر کرنے پر پابندی عائد کی گئی ہے جس سے امن و امان کی صورتحال خراب ہونے کا خدشہ ہو۔ انتظامیہ کا کہنا ہے کہ ان تمام اقدامات کا بنیادی مقصد ڈویژن کے شہریوں کے جان و مال کا تحفظ اور شرپسند عناصر کی سرکوبی کرنا ہے۔