کارپوریٹ سیکٹر میں ڈیجیٹل انقلاب: SECP کا نان لسٹڈ کمپنیوں کے شیئرز کو مکمل ڈیجیٹائز کرنے کا حکم

کراچی: سیکوریٹیز اینڈ ایکسچینج کمیشن آف پاکستان (SECP) نے ملک میں کاروباری شفافیت اور جدت کو فروغ دینے کے لیے نان لسٹڈ کمپنیوں کی مکمل ڈیجیٹائزیشن کا آغاز کر دیا ہے۔ نئے ضوابط کے تحت اب نان لسٹڈ کمپنیوں کے روایتی ‘فزیکل شیئرز’ کو سینٹرل ڈیپازٹری سسٹم (CDS) کے ذریعے لازمی طور پر الیکٹرونک فارم میں منتقل کیا جائے گا۔

ایس ای سی پی کے مطابق، اب نان لسٹڈ کمپنیوں کے شیئرز کی کوئی بھی ٹرانزیکشن فزیکل فارم میں نہیں ہو سکے گی۔ کمپنیوں کو بونس شیئرز، رائٹس ایشو، بائی بیک یا شیئرز کی منتقلی سے قبل اپنے ریکارڈ کو ڈیجیٹل کرنا ہوگا۔ اس اقدام کا بنیادی مقصد فزیکل شیئر سرٹیفکیٹس کے چوری ہونے، ضائع ہونے یا ان میں جعلسازی کے خطرات کو جڑ سے ختم کرنا ہے۔

الیکٹرونک شیئرز کے ذریعے نہ صرف ملکیت کا ریکارڈ محفوظ ہوگا بلکہ کمپنیوں کے درمیان شیئرز سے متعلق پیدا ہونے والے تنازعات کا بھی خاتمہ ہوگا۔ مزید برآں، یہ ڈیجیٹل شیئرز بینکوں سے قرض لینے کے لیے بطور ضمانت (Collateral) بھی آسانی سے استعمال کیے جا سکیں گے۔ ایس ای سی پی نے واضح کیا ہے کہ آئندہ تمام شیئر ٹرانزیکشنز صرف سی ڈی ایس کے ذریعے ہوں گی، جس سے سیٹلمنٹ کا عمل تیز تر اور محفوظ ہو جائے گا۔