عمرہ زائرین میں 22 فیصد سے زائد اضافہ، پاکستان پہلے نمبر پر آگیا

سعودی وزارتِ حج و عمرہ نے اعلان کیا ہے کہ رواں عمرہ سیزن کے آغاز سے اب تک عمرہ زائرین کی تعداد میں 22.5 فیصد کا نمایاں اضافہ ریکارڈ کیا گیا ہے، جس میں دنیا بھر سے آنے والے معتمرین میں پاکستانی زائرین کی تعداد سب سے زیادہ رہی۔ وزارت کے مطابق 15 ذوالحج 1448 ہجری سے شروع ہونے والے عمرہ سیزن کے پہلے ڈیڑھ ماہ، یعنی 29 محرم 1448 ہجری تک 9 لاکھ سے زائد زائرین عمرہ کی سعادت حاصل کر چکے ہیں، جن میں پاکستان سے تقریباً 2 لاکھ، انڈونیشیا سے 1 لاکھ 70 ہزار اور عراق سے 1 لاکھ 30 ہزار معتمرین شامل ہیں۔ سعودی حکام کے مطابق عمرہ ویزوں کا اجرا 31 مئی 2026 سے شروع کیا گیا تھا، جبکہ زائرین کے سعودی عرب میں داخلے کی آخری تاریخ 15 شوال 1448 ہجری (23 مارچ 2027) اور واپسی کی آخری تاریخ 30 شوال 1448 ہجری (7 اپریل 2027) مقرر کی گئی ہے۔ دوسری جانب پاکستان میں بھی آئندہ حج کے لیے رجسٹریشن کا عمل تیزی سے جاری ہے اور وزارتِ مذہبی امور کے مطابق اب تک 3 لاکھ 40 ہزار سے زائد افراد آن لائن رجسٹریشن کرا چکے ہیں، جن میں سے 2 لاکھ 46 ہزار عازمین نے سرکاری جبکہ 94 ہزار نے نجی حج اسکیم کا انتخاب کیا ہے۔