بیمار افراد کیلئے حج کرنے پر پابندی ، سعودی حکومت کا بڑا فیصلہ

ریاض: سعودی عرب کی حکومت نے حج 2026 کے لیے صحت کے حوالے سے نئی ہدایات جاری کرتے ہوئے بیمار اور کمزور عازمین کے لیے سخت پابندیاں عائد کردی ہیں۔ وزارت مذہبی امور پاکستان کے مطابق، ایسے تمام افراد اور ڈاکٹروں کو متنبہ کر دیا گیا ہے جو حج کے لیے فٹنس سرٹیفکیٹ جاری کرتے ہیں۔

سعودی وزارتِ صحت کی گائیڈ لائنز کے تحت، ایسے افراد جو کینسر، دل، گردوں، پھیپھڑوں، یا جگر کے امراض میں مبتلا ہیں، یا رعشہ، نفسیاتی بیماری، کمزور یادداشت اور بڑھاپے کی کمزوری کا شکار ہیں، وہ آئندہ حج نہیں کرسکیں گے۔
اسی طرح حاملہ خواتین، کالی کھانسی، تپ دق یا وائرل ہیمرج بخار جیسے امراض میں مبتلا افراد کو بھی حج کی اجازت نہیں دی جائے گی۔

وزارتِ مذہبی امور نے واضح کیا ہے کہ جعلی یا غلط فٹنس سرٹیفکیٹ جاری کرنے والے ڈاکٹروں کے خلاف کارروائی کی جائے گی، جبکہ اگر کوئی بیمار شخص حج کے لیے پہنچ گیا تو اسے ڈی پورٹ کر دیا جائے گا اور اخراجات خود ادا کرنے ہوں گے۔

سعودی حکام نے مانیٹرنگ ٹیموں کو ہدایت دی ہے کہ وہ ہر عازم کے میڈیکل سرٹیفکیٹ کی تصدیق کریں تاکہ صرف صحتمند اور فٹ افراد ہی سفرِ حج پر روانہ ہوں۔ وزارت کے مطابق، میڈیکل افسران کو مکمل اختیار حاصل ہوگا کہ وہ غیر صحت مند عازمین کو روانگی سے روک سکیں تاکہ حج کے دوران کسی بھی طبی ہنگامی صورتحال سے بچا جا سکے۔