سعودی وزیر خارجہ کی امریکی سینیٹ کمیٹی کے سربراہ سے ملاقات، تعاون بڑھانے پر تبادلہ خیال

سعودی وزیرِ خارجہ شہزادہ فیصل بن فرحان نے اپنے سرکاری دورۂ امریکہ کے دوران واشنگٹن میں امریکی سینیٹ کی انٹیلی جنس کی سلیکٹ کمیٹی کے چیئرمین سینیٹر ٹام کاٹن سے ایک اہم ملاقات کی ہے۔ سعودی پریس ایجنسی (ایس پی اے) کے مطابق اس ملاقات کے دوران خطے کی حالیہ سیاسی و سکیورٹی صورتحال اور دونوں ممالک کے درمیان متعلقہ شعبوں میں باہمی تعاون کو مزید وسعت دینے کے طریقوں پر تفصیلی تبادلہ خیال کیا گیا۔

اس کے علاوہ شہزادہ فیصل بن فرحان نے سینیٹ کی آرمڈ سروسز کمیٹی کے چیئرمین سینیٹر راجر وکر اور کمیٹی کے سینیئر رکن سینیٹر جیک ریڈ سے بھی علیحدہ ملاقات کی ہے۔ ان ملاقاتوں میں سعودی عرب اور امریکہ کے درمیان سٹریٹجک دفاعی تعلقات، سکیورٹی کوآرڈینیشن اور عسکری تعاون کے مختلف پہلوؤں پر غور کیا گیا تاکہ دونوں ممالک کے مشترکہ مفادات اور علاقائی امن و امان کا تحفظ یقینی بنایا جا سکے۔