سعودی عرب دنیا کے 3 ممالک میں شامل، پہلی بار سفید اسٹرابری کی پیداوار کا آغاز

سعودی عرب کو زراعت میں ایک نمایاں اعزاز حاصل ہوا ہے اور یہ دنیا کے تین ممالک میں شامل ہو گیا ہے جو سفید اسٹرابری کی پیداوار کرنے میں کامیاب ہوئے ہیں۔ امریکا اور جاپان کے بعد سعودی عرب اس کارنامے کا حصہ بننے والا تیسرا ملک ہے۔

عرب میڈیا کے مطابق، حائل ریجن میں پہلی مرتبہ سفید اسٹرابری کی پیداوار کا افتتاح کیا گیا، جس میں حائل کے گورنر شہزادہ عبدالعزیز بن سعد بن عبدالعزیز نے شرکت کی۔ اس موقع پر دیگر شاہی شخصیات، پارک کے مالک اور سرکاری حکام بھی موجود تھے۔

گورنر نے حائل اسٹرابری پارک کے ساتویں سیزن کا افتتاح کرتے ہوئے زرعی شعبے میں دانشمند قیادت کی حمایت پر زور دیا، جو قومی معیشت اور غذائی تحفظ کے لیے اہم ہے۔ انہوں نے کہا کہ حائل ریجن مملکت کے اہم زرعی علاقوں میں شامل ہے اور اس کے ذریعے معیشت اور غذائی سلامتی کو مستحکم کرنے میں مدد ملتی ہے۔

واضح رہے کہ سفید اسٹرابری غذائیت سے بھرپور پھل ہے جو دنیا میں عموماً سرخ رنگ میں پیدا ہوتا ہے۔ اس کا استعمال پھل کے طور پر، جوس، شیک اور مختلف میٹھے پکوانوں میں بھی کیا جاتا ہے۔