سیٹلائٹ تصاویر سے کابل، قندھاراور گردیزمیں پاکستانی حملوں سے بڑے نقصان کی تصدیق

افغان دارالحکومت کابل کے علاوہ قندھار اور گردیز کی سیٹلائٹ سے موصول تازہ فوٹیج کے ذریعے پاکستانی کارروائی کے نتیجے میں بڑے نقصان کی تصدیق ہوگئی ہے۔

برطانوی میڈیا ادارے کی رپورٹ کے مطابق پلینٹ لیبز سے موصول ہونے والی تازہ سیٹلائٹ تصاویرسےافغانستان پر گذشتہ رات پاکستان کی جانب سے کیے گئے فضائی حملوں کے نتیجے میں ہونے والے نقصانات کا اندازہ لگایا جا سکتا ہے۔

تصاویرمیں کابل میں دو مقامات اور قندھار اور گردیز میں کئی مقامات پر پہنچنے والے نقصان کو واضح طور پر دیکھا جا سکتا ہے۔کابل میں ہونے والا نقصان پاکستان کی سکیورٹی فورسز کی جانب سے جاری کی گئی فوٹیج سے مطابقت رکھتا ہے، جس میں شہر کے مشرقی علاقے میں تقریباً 400 میٹر کے فاصلے پر واقع دو عمارتوں پر حملے ہوتے دکھائے گئے ہیں۔

اس طرح افغانستان کے جنوب مشرقی شہر گردیز میں ایک فوجی اڈے میں واقع چار عمارتوں پر آگ سے جھلسنے کے نشانات اور نقصانات دیکھے جا سکتے ہیں۔

ناسا سے موصول ہونے والے ڈیٹا میں بھی اس مقام پر رات کے وقت ہیٹ سگنیچر ریکارڈ کیا گیا، جو اس مقام پر بڑے پیمانے پر آگ لگنے کے امکان کو ظاہر کرتا ہے۔سیٹلائیٹ تصاویر کے مطابق قندھارمیں واقع ایئرپورٹ سے 4.5 کلومیٹر جنوب مشرق میں دو مقامات کو پہنچا نقصان دیکھا جا سکتا ہے۔