کے پی اور بلوچستان کا کوئی موازنہ نہیں، وفاق کے آئینی اقدام کی حمایت کرتے ہیں: سرفراز بگٹی

وزیراعلیٰ بلوچستان میر سرفراز بگٹی نے صوبائی اسمبلی کے اجلاس میں اظہارِ خیال کرتے ہوئے کہا ہے کہ خیبر پختونخوا اور بلوچستان کے سیکیورٹی حالات اور دونوں صوبائی حکومتوں کے کردار کا کوئی موازنہ نہیں کیا جا سکتا۔ انہوں نے کہا کہ وفاقی حکومت نے خیبر پختونخوا کے حوالے سے آئین کے مطابق اقدام اٹھایا ہے اور اس میں کوئی غیر آئینی کام نہیں کیا گیا، لہذا بلوچستان حکومت وفاق کے اس اقدام کی مکمل حمایت کرتی ہے۔

بلوچستان اسمبلی کے ایوان سے خطاب کرتے ہوئے میر سرفراز بگٹی نے کہا کہ خیبر پختونخوا میں ایمرجنسی محض امن و امان کے مسئلئے پر نہیں بلکہ صوبائی حکومت کی جانب سے آئینی و سیکیورٹی کردار ادا نہ کرنے پر نافذ کی گئی ہے۔ انہوں نے الزام عائد کیا کہ خیبر پختونخوا کی حاکم جماعت نے ہمیشہ دہشت گردی کے خلاف نرم رویہ اپنایا اور سیکیورٹی کے لیے مختص سرکاری فنڈز کو سوشل میڈیا ٹیمیں بنانے پر خرچ کیا۔ ان کا کہنا تھا کہ بلوچستان میں حکومت دہشت گردی کے خلاف جنگ کی پوری ذمہ داری قبول کرتی ہے اور سیکیورٹی اداروں کے شانہ بشانہ کھڑی ہے، جبکہ خیبر پختونخوا میں ایسا نہیں کیا جا رہا۔

وزیراعلیٰ بلوچستان نے سوال اٹھایا کہ تمام سیاسی جماعتوں کے رہنما اور کارکنان دہشت گردی کی زد میں آئے لیکن ایک مخصوص جماعت پر کبھی حملہ نہیں ہوا، جس سے یہ تاثر ملتا ہے کہ ان کے روابط دہشت گردوں کے ساتھ ہیں۔ انہوں نے واضح کیا کہ دہشت گردی کا خاتمہ اس وقت تک ممکن نہیں جب تک قانون سازی، بیانیے کی تشکیل اور عملی میدان میں سیکیورٹی فورسز کو مکمل صوبائی معاونت حاصل نہ ہو۔ میر سرفراز بگٹی نے اعادہ کیا کہ بلوچستان اسمبلی کے تمام اراکین دہشت گردی کے خاتمے اور سیکیورٹی فورسز کی حمایت میں ایک پیج پر ہیں۔