اٹھارویں صدی کے ہسپانی جہاز ’سان جوز‘ کے خزانے کی پہلی قسط نکالی گئی

سان جوز: اٹھارویں صدی کے ہسپانی جنگی جہاز ’سان جوز‘ کے سمندر کی تہہ میں موجود ملبے سے خزانے کی پہلی قسط بازیاب کر لی گئی ہے۔ ملبے میں موجود سونے اور چاندی کے 1 کروڑ 10 لاکھ سکے، جن کی مالیت تقریباً 20 ارب ڈالر بتائی گئی ہے، عالمی توجہ کا مرکز بن چکے ہیں۔

64 توپوں کا حامل یہ ہسپانوی نیوی جہاز 1708 میں برطانویوں نے کولمبیا کے ساحل کے قریب ڈبو دیا تھا۔ اب کولمبین مشن نے خزانے سے ابتدائی نوادرات نکالے ہیں، جن میں ایک توپ، تین سکے اور کچھ پورسلین شامل ہیں۔

سان جوز بحیرہ کریبیئن میں 600 میٹر کی گہرائی میں موجود ہے، لیکن اس کی حتمی لوکیشن ایک ریاستی راز ہے اور اس کی ملکیت پر امریکا، کولمبیا اور اسپین کے درمیان شدید قانونی تنازع جاری ہے۔

امریکی سرمایہ داروں کے گروپ ’سی سرچ آرماڈا‘ کا دعویٰ ہے کہ اس نے جہاز 1982 میں دریافت کیا تھا اور وہ اپنے حصے کے 10 ارب ڈالر کا مطالبہ کر رہا ہے، جو کہ اندازاً مجموعی مالیت کا نصف ہے۔