4 اکتوبر کی تاریخ بدلنے کی کوئی وجہ نظر نہیں آ رہی: سلمان اکرم راجہ

پاکستان تحریک انصاف (پی ٹی آئی) کے سیکرٹری جنرل سلمان اکرم راجہ نے واضح کیا ہے کہ پارٹی کی طرف سے 4 اکتوبر کو احتجاج کی دی گئی تاریخ میں تبدیلی کی فی الحال کوئی وجہ یا جواز نہیں ہے۔ دنیا نیوز کے پروگرام ’’ٹونائٹ ود ثمر عباس‘‘ میں گفتگو کرتے ہوئے سلمان اکرم راجہ نے کہا کہ 27 ستمبر کا فیصلہ بھی واضح تھا اور 4 اکتوبر کا مؤقف بھی بالکل واضح ہے۔ انہوں نے زور دیا کہ پی ٹی آئی ملک میں انتشار نہیں چاہتی بلکہ پرامن جدوجہد پر یقین رکھتی ہے، کیونکہ حقیقی تبدیلی قوم لاتی ہے اور فیصلہ بھی عوام ہی نے کرنا ہوتا ہے۔

مذاکرات کے حوالے سے بات کرتے ہوئے سیکرٹری جنرل نے بتایا کہ سیاسی جماعتوں یا حکومت کے ساتھ مذاکرات کا تمام تر اختیار اپوزیشن اتحاد کے رہنماؤں محمود خان اچکزئی اور علامہ راجہ ناصر عباس کے پاس ہے۔ عدالتی نظام پر تحفظات کا اظہار کرتے ہوئے انہوں نے کہا کہ پی ٹی آئی کو عدالتوں سے انصاف ملنے کی زیادہ توقع نہیں ہے، اور اگر وفاقی حکومت نے خیبرپختونخوا میں گورنر راج نافذ کرنے جیسی کوئی کوشش کی تو حتمی فیصلہ عوام ہی کریں گے۔