چاند نظر آگیا، پاکستان میں یکم صفر المظفر 16 جولائی کو ہوگی

مرکزی رویتِ ہلال کمیٹی نے باضابطہ اعلان کیا ہے کہ پاکستان میں ہجری سال 1448 کے دوسرے مہینے ‘صفر المظفر’ کا چاند نظر آ گیا ہے، جس کے بعد یکم صفر المظفر 16 جولائی 2026 بروز جمعرات کو ہوگی۔ چاند کی رویت کا فیصلہ چیئرمین کمیٹی مولانا عبدالخبیر آزاد کی زیرِ صدارت وزارتِ مذہبی امور کے کوہسار کمپلیکس، اسلام آباد میں منعقدہ اجلاس میں کیا گیا۔ اجلاس کے دوران ملک کے مختلف حصوں، بالخصوص نوکنڈی اور سندھ کے متعدد اضلاع سے چاند دیکھنے کی مستند شہادتیں موصول ہوئیں، جن کی تصدیق کے بعد اتفاقِ رائے سے چاند نظر آنے کا اعلان کیا گیا۔ اجلاس میں زونل رویت ہلال کمیٹی کے ارکان سمیت محکمہ موسمیات، سپارکو اور وزارتِ سائنس و ٹیکنالوجی کے ماہرین نے بھی تکنیکی معاونت فراہم کی۔ اجلاس کے اختتام پر عالمِ اسلام کے اتحاد، پاکستان کی ترقی و سلامتی، حرمین شریفین کے تحفظ اور غزہ، فلسطین اور مقبوضہ کشمیر کے مظلوم مسلمانوں کی آزادی کے لیے خصوصی دعا کی گئی۔