امریکا کی ایران کی 27 فضائی کمپنیوں اور دیگر اداروں پر پابندیاں عائد

امریکی محکمہ خزانہ نے ایرانی معیشت پر دباؤ مزید بڑھاتے ہوئے ایران کی 27 نجی و سرکاری فضائی کمپنیوں اور متعدد دیگر تجارتی اداروں پر سخت مالیاتی پابندیاں عائد کرنے کا باضابطہ اعلان کیا ہے۔ یہ شدید اقدام امریکی انتظامیہ کی جانب سے ایرانی معیشت کو عالمی مالیاتی و تجارتی نظام سے مکمل طور پر الگ تھلگ کرنے کی حکمتِ عملی کا حصہ ہے۔ امریکی مالیاتی حکام کے مطابق یہ پابندیاں ’آپریشن اکنامک آؤٹ کاسٹ‘ کے تحت لگائی گئی ہیں، جس کا مقصد ایران کی ان تمام فضائی لائنوں کو ہدف بنانا ہے جو اس سے قبل امریکی پابندیوں کی فہرست سے باہر تھیں۔

امریکی وزیرِ خزانہ سکاٹ بیسنٹ نے پابندیوں کا دفاع کرتے ہوئے کہا کہ امریکی حکومت نے ’آپریشن اکنامک آؤٹ کاسٹ‘ کے تحت عزم ظاہر کیا تھا کہ ایرانی حکومت، بالخصوص پاسدارانِ انقلاب اور اس کے حامیوں کو مالی سہارا فراہم کرنے والے عناصر کو سخت خمیازہ بھگتنا پڑے گا۔ انہوں نے کہا کہ واشنگٹن نے اپنا وعدہ پورا کرتے ہوئے ان تمام ایوی ایشن کمپنیوں اور اداروں پر پابندیاں عائد کی ہیں جو اس سے قبل امریکی فہرست میں شامل ‘ماہان ایئر’ اور دیگر بلیک لسٹڈ ایرانی کمپنیوں کو آپریشنل یا لاجسٹک مدد فراہم کر رہی تھیں۔