امریکی صدر ٹرمپ نے روس اور یوکرین کے درمیان 3 روزہ جنگ بندی کا اعلان کر دیا

امریکی صدر ڈونلڈ ٹرمپ نے روس اور یوکرین کے درمیان 3 روزہ جنگ بندی طے پانے کا اعلان کر دیا۔

امریکی صدر نے سماجی رابطے کی ویب سائٹ  پر جاری اپنے بیان میں کہا کہ روس اور یوکرین کے درمیان 9، 10 اور 11 مئی کو جنگ بندی برقرار رہے گی۔ ان دنوں دونوں ممالک میں یومِ فتح کی تقریبات بھی منعقد ہوں گی۔

ڈونلڈ ٹرمپ کے مطابق یہ دن دوسری عالمی جنگ میں سوویت یونین کی کامیابی کی یاد میں منایا جاتا ہے، جس میں روس اور یوکرین ایک ساتھ شامل تھے۔

انہوں نے مزید بتایا کہ جنگ بندی کے دوران دونوں ممالک کے درمیان ایک، ایک ہزار قیدیوں کا تبادلہ بھی کیا جائے گا۔

امریکی صدر کا کہنا تھا کہ جنگ بندی کی یہ درخواست انہوں نے خود کی تھی، جس پر روسی صدر ولادیمیر پیوٹن اور یوکرینی صدر ولادیمیر زیلنسکی نے اتفاق کیا۔

ٹرمپ نے امید ظاہر کی کہ یہ پیش رفت روس اور یوکرین کے درمیان جاری طویل جنگ کے خاتمے کی جانب اہم قدم ثابت ہوگی۔ انہوں نے کہا کہ تنازع کے حل کے لیے مذاکرات جاری ہیں اور حالات بتدریج بہتری کی طرف بڑھ رہے ہیں۔