روس اور یوکرین جنگ بندی معاہدے کے قریب ہیں، ٹرمپ کا دعویٰ

امریکی صدر ڈونلڈ ٹرمپ نے کہا ہے کہ روس اور یوکرین کے درمیان جاری جنگ کے خاتمے کے لیے جنگ بندی معاہدہ قریب آ چکا ہے۔

وائٹ ہاؤس میں میڈیا سے گفتگو کرتے ہوئے امریکی صدر کا کہنا تھا کہ یوکرینی اور یورپی قیادت سے روس یوکرین جنگ بندی پر تفصیلی بات چیت ہوئی ہے، جبکہ امریکی امن منصوبے کو یورپی رہنماؤں کی مکمل حمایت حاصل ہے۔

صدر ٹرمپ کے مطابق برلن میں ہونے والے حالیہ مذاکرات کے بعد نمایاں پیش رفت سامنے آئی ہے، اور اس سلسلے میں روسی صدر ولادیمیر پیوٹن سے بھی براہِ راست بات چیت کی گئی ہے۔

دوسری جانب یورپی رہنماؤں نے اس بات پر اتفاق کیا ہے کہ مغربی ممالک کی جانب سے یوکرین کو دی جانے والی کسی بھی سکیورٹی ضمانت میں انہیں شامل کیا جائے۔

رہنماؤں کا کہنا ہے کہ اگرچہ مذاکرات میں پیش رفت ہوئی ہے، تاہم علاقے کے کنٹرول کا معاملہ اب بھی ایک بڑی رکاوٹ بنا ہوا ہے۔