ایران کو اپنے دفاع کا حق حاصل ہے، روس

روس نے ایران اور اس کے گردونواح میں جاری فوجی کارروائیوں کے تناظر میں تہران کے موقف کی بھرپور حمایت کرتے ہوئے کہا ہے کہ ایران کو بین الاقوامی قوانین کے تحت اپنے دفاع کا مکمل حق حاصل ہے۔ روسی وزارتِ خارجہ کی ترجمان ماریا زخارووا نے ماسکو میں بریفنگ کے دوران واضح کیا کہ اقوامِ متحدہ کے چارٹر کے آرٹیکل 51 کے تحت ایران، اور کسی بھی دوسرے ملک کو اپنی خودمختاری اور سلامتی کے تحفظ کا حق حاصل ہے۔ انہوں نے ایران میں سویلین تنصیبات اور بنیادی ڈھانچے پر حملوں کو ناقابلِ قبول قرار دیتے ہوئے خطے میں بڑھتے ہوئے تصادم پر گہری تشویش کا اظہار کیا۔

روسی وزارتِ خارجہ نے امریکہ اور دیگر فریقین پر زور دیا ہے کہ وہ طاقت کے استعمال کے بجائے فوری طور پر سیاسی اور سفارتی راستے پر واپس آئیں تاکہ مشرقِ وسطیٰ کو کسی بڑی انسانی یا ماحولیاتی تباہی سے بچایا جا سکے۔ روس کے مطابق خطے میں عدم استحکام کی بنیادی وجہ بیرونی مداخلت اور بلا اشتعال فوجی اقدامات ہیں۔ حالیہ برسوں میں روس اور ایران کے درمیان دفاعی، تزویراتی اور اقتصادی تعلقات میں غیر معمولی اضافہ ہوا ہے، اور ماسکو نے اقوامِ متحدہ کی سلامتی کونسل سمیت ہر بین الاقوامی فورم پر ایران کے سلامتی کے جائز مفادات کے تحفظ کی وکالت کی ہے۔