روس کا یوکرین پر ہائپرسونک میزائل حملہ، 10 لاکھ سے زائد گھر بجلی سے محروم

روس نے یوکرین پر ہائپرسونک میزائلوں اور ڈرونز کے ذریعے بڑے پیمانے پر حملہ کیا ہے، جس میں فوجی اور توانائی تنصیبات کو نشانہ بنایا گیا، نتیجتاً ملک بھر میں 10 لاکھ سے زائد گھر بجلی سے محروم ہو گئے۔

یوکرینی حکام کے مطابق ہفتے کی شب روسی افواج کی جانب سے شدید حملوں کی لہر دیکھی گئی، جس کے دوران توانائی اور صنعتی انفرااسٹرکچر کو خاص طور پر نشانہ بنایا گیا۔ ان حملوں کے باعث بجلی کی فراہمی بری طرح متاثر ہوئی۔

یوکرینی صدر وولودیمیر زیلنسکی نے بتایا کہ روس نے رات گئے حملوں میں 450 سے زائد ڈرونز اور 30 میزائل استعمال کیے، جن کے نتیجے میں درجنوں شہری تنصیبات کو نقصان پہنچا۔

یوکرین کے وزیرِ داخلہ کے مطابق روسی حملوں میں پانچ مختلف علاقوں کو نشانہ بنایا گیا، جس میں کم از کم پانچ افراد زخمی ہوئے۔ حکام کا کہنا ہے کہ متاثرہ علاقوں میں آگ بجھانے اور بجلی کی بحالی کا کام جاری ہے۔

دوسری جانب روسی وزارتِ دفاع نے دعویٰ کیا ہے کہ یہ حملہ روس کے اندر شہری اہداف پر یوکرین کے حملوں کے جواب میں کیا گیا، جس میں یوکرین کی فوجی اور توانائی تنصیبات کو نشانہ بنایا گیا۔ وزارتِ دفاع کے مطابق حملے میں کنزال ہائپرسونک میزائل سمیت دیگر جدید ہتھیار استعمال کیے گئے۔