روسی فوج کا خارکوف میں 2 آبادیوں پر کنٹرول، یوکرینی فوج کو 1,105 اہلکاروں کا نقصان

روس کی وزارتِ دفاع نے دعویٰ کیا ہے کہ اس کی افواج نے گزشتہ 24 گھنٹوں کے دوران یوکرین کے مشرقی علاقے خارکوف (Kharkiv) میں پیش قدمی کرتے ہوئے نیفیودوفکا (Nefyodovka) اور چورنویے (Chornoye) کی آبادیوں پر مکمل کنٹرول حاصل کر لیا ہے۔

روسی وزارتِ دفاع کے مطابق ‘بیٹل گروپ نارتھ’ کے دستے خارکوف کے محاذ پر اپنے زیرِ کنٹرول علاقوں کا دائرہ وسیع کر رہے ہیں اور نکولائیفکا و وارواروفکا کی جانب پیش قدمی جاری ہے۔ روسی حکام کے مطابق گزشتہ 24 گھنٹوں کے دوران مختلف محاذوں (شمال، مغرب، جنوب، سینٹر، مشرق اور دنیپر) پر کارروائیوں کے دوران 1,105 یوکرینی فوجی ہلاک یا زخمی ہوئے، جبکہ دونیتسک کے شہر دوبروپولیہ میں 31 عمارتوں پر قبضہ کیا گیا ہے۔

مزید برآں، روسی دفاعی حکام کا کہنا ہے کہ فضائیہ، ڈرون یونٹس اور توپ خانے نے 145 علاقوں میں یوکرینی ملٹری انفراسٹرکچر اور ڈرون ورکشاپس کو نشانہ بنایا، جبکہ فضائی دفاعی نظام (Air Defence) نے 342 یوکرینی ڈرونز اور 4 فلیمنگو کروز میزائلوں کو تباہ کر دیا۔