ایران کی کمر میں چھرا گھونپا گیا، روس نے امریکا و اسرائیلی حملوں کو جارحیت قرار دے دیا

اقوام متحدہ کی سلامتی کونسل کے ہنگامی اجلاس میں روس نے امریکا اور اسرائیل کے ایران پر حملوں کو کھلی جارحیت قرار دے دیا۔

روسی مندوب نے اجلاس سے خطاب کرتے ہوئے کہا کہ جارحیت کر کے ایران کی کمر میں چھرا گھونپا گیا ہے اور ایران کے خلاف امریکی الزامات بے بنیاد ہیں۔ ان کا کہنا تھا کہ بین الاقوامی ایٹمی توانائی ایجنسی نے کبھی یہ نہیں کہا کہ ایران ایٹمی ہتھیار تیار کر رہا ہے۔

روسی مندوب نے عراق جنگ کا حوالہ دیتے ہوئے کہا کہ اس وقت بھی بے بنیاد دعوؤں کو جواز بنایا گیا تھا۔ انہوں نے کہا کہ مذاکرات میں شامل ایرانی شہریوں پر حملے کیے جا رہے ہیں جبکہ یورپی ممالک اس کی مذمت نہیں کر رہے۔

ان کا مزید کہنا تھا کہ ایران کے معاملے پر دنیا کو گمراہ کرنے کی کوششیں کبھی کامیاب نہیں ہوں گی۔

دوسری جانب سلامتی کونسل میں فرانس نے مؤقف اختیار کیا کہ ایران اپنی عالمی ذمہ داریاں پوری کرے۔ فرانسیسی مندوب نے خطے کے ممالک پر ایرانی حملوں کی مذمت کرتے ہوئے کہا کہ ایران خطے میں عدم استحکام کی پالیسی جاری رکھے ہوئے ہے اور اسے بیلسٹک میزائل پروگرام پر مذاکرات کرنا چاہئیں۔

اجلاس میں چین کے مندوب نے بھی شہریوں پر حملوں سے گریز کرنے اور کشیدگی فوری ختم کر کے مذاکرات کی بحالی کا مطالبہ کیا۔