واشنگٹن: مارکو روبیو کی شہباز شریف سے ملاقات، غزہ بورڈ آف پیس میں کردار پر پاکستان کی تعریف

امریکا کے وزیر خارجہ مارکو روبیو نے واشنگٹن ڈی سی میں وزیر اعظم پاکستان شہباز شریف اور نائب وزیر اعظم اسحاق ڈار سے ملاقات کی۔ ملاقات کے بعد امریکی وزیر خارجہ نے تصویر سماجی رابطے کی ویب سائٹ پر شیئر کی۔

مارکو روبیو نے اپنے بیان میں کہا کہ ملاقات میں دوطرفہ اسٹریٹجک تعلقات، اہم معدنیات، ترقیاتی شعبے اور انسداد دہشت گردی کے امور پر تبادلہ خیال کیا گیا۔ انہوں نے کہا کہ وہ امریکی صدر ٹرمپ کی جانب سے غزہ امن منصوبے میں پاکستان کی معاونت اور بورڈ آف پیس میں شمولیت پر پاکستان کو سراہتے ہیں۔

امریکی محکمہ خارجہ کے ترجمان کے مطابق سیکرٹری روبیو نے بلوچستان میں 31 جنوری کے حملوں اور اسلام آباد میں 6 فروری کے بم دھماکے پر تعزیت کا اظہار کیا اور دہشت گردی کے خلاف جاری شراکت داری کی اہمیت پر زور دیا۔

انہوں نے واشنگٹن میں منعقدہ اہم معدنیات کے وزارتی اجلاس میں پاکستان کی شرکت کا خیرمقدم بھی کیا۔