جنوبی کوریا میں دنیا کے پہلے روبوٹ راہب کی رونمائی، بدھ مت کی مذہبی تقریب میں شرکت

جنوبی کوریا میں بدھ مت کے تہوار سے قبل دنیا کے پہلے روبوٹ راہب کو باضابطہ طور پر متعارف کرا دیا گیا۔

غیر ملکی میڈیا کے مطابق دارالحکومت سیول کے جوگیسا مندر میں منعقدہ تقریب کے دوران 130 سینٹی میٹر قد والے انسانی شکل کے روبوٹ نے راہبوں کے ہمراہ عبادت میں حصہ لیا۔ روبوٹ نے روایتی بدھ مت لباس اور مذہبی چادر پہن رکھی تھی جبکہ اس نے ہاتھ جوڑ کر دعائیہ انداز بھی اختیار کیا۔

یہ روبوٹ چینی روبوٹکس کمپنی کی جانب سے تیار کیا گیا ہے اور اسے ’’گابی‘‘ کا مذہبی نام دیا گیا۔ بدھ مت کی جوگی آرڈر کی جانب سے بدھ کے یوم پیدائش کی تقریبات کے سلسلے میں خصوصی رسم کے دوران روبوٹ کو یہ نام عطا کیا گیا۔

تقریب کے منتظمین کا کہنا ہے کہ جدید ٹیکنالوجی اور مذہبی روایات کے امتزاج کا مقصد نوجوان نسل کو روحانی سرگرمیوں سے جوڑنا ہے۔

یہ منفرد منظر دیکھنے کے لیے بڑی تعداد میں شہری مندر پہنچے جبکہ روبوٹ راہب کی تصاویر اور ویڈیوز سوشل میڈیا پر بھی تیزی سے وائرل ہو رہی ہیں۔