راولپنڈی: امن و امان کے لیے دفعہ 144 میں 24 دسمبر تک توسیع، جلسے اور ریلیاں مکمل طور پر ممنوع

راولپنڈی میں امن و امان کی صورتحال کو برقرار رکھنے کے لیے دفعہ 144 میں ایک بار پھر توسیع کر دی گئی ہے۔ ڈپٹی کمشنر حسن وقار چیمہ کی جانب سے جاری نوٹیفکیشن کے مطابق دفعہ 144 کا نفاذ 24 دسمبر تک برقرار رہے گا۔

نوٹیفکیشن میں واضح کیا گیا ہے کہ اس دوران شہر بھر میں جلسے، جلوس اور ریلیوں کے انعقاد پر مکمل پابندی ہوگی، جبکہ چار سے زائد افراد کے ایک جگہ جمع ہونے پر بھی پابندی عائد ہوگی۔ انتظامیہ کے مطابق اس اقدام کا مقصد کسی بھی ممکنہ ناخوشگوار واقعے سے بچاؤ اور عوامی تحفظ کو یقینی بنانا ہے۔

ڈپٹی کمشنر کے نوٹیفکیشن میں لاؤڈ اسپیکر کے استعمال پر بھی پابندی عائد کی گئی ہے اور خلاف ورزی کرنے والوں کے خلاف قانون کے مطابق کارروائی کی جائے گی۔

انتظامیہ نے شہریوں سے اپیل کی ہے کہ وہ امن و امان برقرار رکھنے کے لیے حکومتی احکامات پر عمل کریں اور کسی بھی غیر قانونی سرگرمی سے گریز کریں۔