راولپنڈی میں منی ڈیم میں ڈوب کو دو نوجوان جاں بحق

تھانہ صدر بیرونی کے علاقے اڈیالہ روڈ پر واقع ایک مقامی منی ڈیم میں نہاتے ہوئے دو نوجوان ڈوب کر جاں بحق ہو گئے، جبکہ چک بیلی خان روڈ پر ڈمپر اور کار کے مابین ہونے والے ٹریفک حادثے میں 4 کار سوار شدید زخمی ہو گئے۔ ریسکیو 1122 نے دونوں مقامات پر فوری امدادی کارروائیاں سرانجام دیں۔

حکام کے مطابق، پہلا افسوسناک واقعہ اڈیالہ روڈ پر آر وی ایس سوسائٹی جانی موڑ کے قریب پیش آیا، جہاں 24 سالہ ہلال اور 19 سالہ ذیشان منی ڈیم میں نہا رہے تھے۔ اس دوران دونوں نوجوان گہرے پانی میں چلے گئے اور ڈوب کر دم توڑ گئے۔ واقعے کی اطلاع ملتے ہی ریسکیو 1122 کی غوطہ خور ٹیم نے موقع پر پہنچ کر دونوں کو پانی سے نکالا اور سی پی آر (CPR) دیتے ہوئے جان بچانے کی ہر ممکن کوشش کی، تاہم ہسپتال منتقلی کے دوران دونوں جانبر نہ ہو سکے۔

دوسری جانب، جوڑیاں کے قریب چک بیلی خان روڈ پر بہال چوک کے مقام پر تیز رفتار ڈمپر اور کار میں زوردار تصادم ہوا۔ حادثے کے نتیجے میں کار میں سوار 4 افراد شدید زخمی ہو گئے۔ ریسکیو ٹیموں نے زخمیوں کو موقع پر ابتدائی طبی امداد فراہم کرنے کے بعد فوری طور پر ہسپتال منتقل کیا، جہاں ڈاکٹروں کے مطابق تمام زخمیوں کی حالت فی الحال خطرے سے باہر بتائی جاتی ہے۔