مولاناکو جلد احساس ہوگا ان کا فیصلہ ملک و قوم کے حق میں نہیں: رانا تنویر حسین

وفاقی وزیر برائے قومی غذائی تحفظ و تحقیق رانا تنویر حسین نے کہا ہے کہ جمیعت علمائے اسلام (ف) کے سربراہ مولانا فضل الرحمان کو جلد احساس ہوگا کہ ان کا حالیہ فیصلہ ملک و قوم کے مفاد میں نہیں ہے۔

اپنے آبائی حلقے میں میڈیا سے گفتگو کرتے ہوئے وفاقی وزیر نے پاکستان تحریک انصاف (پی ٹی آئی) کی پالیسیوں اور خیبر پختونخوا کے سیکیورٹی حالات پر سخت تنقید کی۔ انہوں نے قائد مسلم لیگ (ن) میاں نواز شریف کے بیان کی توثیق کرتے ہوئے کہا کہ خیبر پختونخوا میں ایمرجنسی کا نفاذ بہت پہلے ہو جانا چاہیے تھا تاکہ دہشت گردی سے ہونے والے نقصان کو روکا جا سکتا۔ رانا تنویر کا دعویٰ تھا کہ گزشتہ دو سالوں کے دوران کے پی کے میں دہشت گردی کے واقعات 2,700 سے بڑھ کر 9,000 تک پہنچ گئے ہیں اور الزام عائد کیا کہ پی ٹی آئی حکومت نے قیدیوں کو چھڑا کر صوبے میں اباد کیا جس کے اثرات سامنے آ رہے ہیں۔

جمعیت علمائے اسلام کے سربراہ سے متعلق بات کرتے ہوئے انہوں نے کہا کہ مولانا فضل الرحمان انتہائی قابلِ احترام ہیں لیکن انہوں نے اپنی روایت اور سوچ کے برعکس قدم اٹھایا ہے۔ ان کا کہنا تھا کہ مولانا کے اپنے علاقے میں بھی دہشت گردی کے واقعات پیش آ رہے ہیں، اس لیے انہیں حکومت کی انسدادِ دہشت گردی کی کوششوں کا ساتھ دینا چاہیے تھا۔

ملکی معاشی صورتِ حال پر بات کرتے ہوئے وفاقی وزیر نے کہا کہ صرف سعودی عرب پر حملوں کے اثرات ہی نہیں بلکہ مشرقِ وسطیٰ میں جاری خلیجی جنگ کے بھی پاکستانی معیشت پر منفی اثرات مرتب ہوئے ہیں۔ انہوں نے بتایا کہ وزیرِ اعظم شہباز شریف کی قیادت میں معاشی ترقی جاری تھی تاہم جنگی حالات کے باعث رفتار متاثر ہوئی ہے، اس کے باوجود حکومت نے پیٹرولیم اور گیس پر سبسڈی دے کر عوام کو ممکنہ ریلیف فراہم کیا ہے۔