فورسز کے ساتھ کھڑی نہ ہونے والی سیاسی جماعت مائنس ہو جائے گی: رانا ثنا اللہ

وزیراعظم کے مشیر برائے سیاسی امور سینیٹر رانا ثناء اللہ نے واضح کیا ہے کہ جو بھی سیاسی جماعت خلوص دل کے ساتھ ملکی سلامتی کے اداروں اور فورسز کے ساتھ نہیں کھڑی ہوگی، وہ سیاست سے مائنس (منہا) ہو جائے گی۔

نجی ٹی وی کے پروگرام میں گفتگو کرتے ہوئے رانا ثناء اللہ نے بتایا کہ گورنر خیبرپختونخوا کی جانب سے صوبے کی امن و امان کی صورتحال کے تناظر میں 160 ارب روپے کا تقاضا کیا گیا تھا، جسے وزیراعظم نے فوری طور پر منظور کر لیا ہے۔ انہوں نے زور دیا کہ خیبرپختونخوا سے دہشت گردی کا مکمل قلع قمع کرنا حکومت کی اولین ترجیح ہے اور اس لعنت کو ختم کیے بغیر عوام کے معیارِ زندگی میں بہتری ممکن نہیں۔

رانا ثناء اللہ نے مزید کہا کہ دہشت گردی کے خلاف جنگ میں پوری قوم اور تمام سیاسی قوتوں کو یکجا ہونا پڑے گا۔ 28 ویں آئینی ترمیم کے حوالے سے بات کرتے ہوئے انہوں نے وضاحت کی کہ اس وقت 28 ویں ترمیم پر نہ تو کوئی بات چیت ہوئی ہے اور نہ ہی اس کا کوئی مسودہ سامنے آیا ہے۔