آبنائے ہرمز، باب المندب بند ہونے سے تیل مہنگا ہوا، مہنگائی سے پوری دنیا پریشان ہے: رانا ثناء اللہ

وزیراعظم کے مشیر رانا ثناء اللہ نے فیصل آباد میں ایک تقریب سے خطاب کرتے ہوئے کہا ہے کہ آبنائے ہرمز اور باب المندب کی بندش اور عالمی بحران کے باعث دنیا بھر میں تیل کی قیمتوں میں شدید اضافہ ہوا ہے، جس کے اثرات سے پاکستان بھی متاثر ہو رہا ہے۔ انہوں نے کہا کہ اس وقت پورا عالم مہنگائی کی لپیٹ میں ہے، لیکن عالمی کساد بازاری کے ان سخت حالات میں دنیا کے کسی بھی ملک میں ہنگامہ آرائی یا حکومت مخالف لانگ مارچ نہیں کیے جاتے، بلکہ تمام اقوام مل کر چیلنجز کا مقابلہ کرتی ہیں۔

رانا ثناء اللہ نے سیاسی صورتِ حال پر تشویش کا اظہار کرتے ہوئے کہا کہ ملک میں کچھ سیاسی عناصر مسلسل عوام کو گمراہ کرنے اور بے امنی پھیلانے کی کوششوں میں مصروف ہیں، جبکہ اس نازک موڑ پر پاکستان کو سب سے زیادہ امن، رواداری اور قومی اتحاد کی ضرورت ہے۔ انہوں نے زور دے کر کہا کہ دنیا پاکستان کو ایک ایسی ذمہ دار اور باوقار ریاست کے طور پر دیکھتی ہے جو نہ صرف اپنی سرحدوں اور مفادات کی حفاظت کرنا جانتی ہے بلکہ خطے میں بھی اپنا مثبت کردار ادا کر سکتی ہے۔