رانا ثنا اللہ کی اپوزیشن کو وزیراعظم ہاؤس میں ہونیوالی بریفنگ میں شرکت کی دعوت

مشرقِ وسطیٰ کی کشیدہ صورتحال اور ایران پر ہونے والے حملوں کے پیشِ نظر حکومت نے اپوزیشن کو اعتماد میں لینے کا فیصلہ کر لیا ہے۔ وزیراعظم شہباز شریف کے مشیر برائے سیاسی امور رانا ثنا اللہ کی قیادت میں حکومتی وفد نے اپوزیشن لیڈر محمود خان اچکزئی اور سینیٹ میں قائدِ حزبِ اختلاف علامہ راجہ ناصر عباس سے پارلیمنٹ ہاؤس میں ان کے چیمبر میں ملاقات کی۔

اس ملاقات کے دوران رانا ثنا اللہ نے وزیراعظم شہباز شریف کی جانب سے بدھ کی صبح ساڑھے گیارہ بجے وزیراعظم ہاؤس میں منعقد ہونے والے “اِن کیمرا” اجلاس کی باضابطہ دعوت دی۔ رانا ثنا اللہ کا کہنا تھا کہ موجودہ عالمی حالات تقاضا کرتے ہیں کہ تمام سیاسی جماعتیں ذاتی اور جماعتی اختلافات کو بالائے طاق رکھ کر قومی سلامتی کے لیے متحد ہو جائیں۔ اپوزیشن رہنماؤں نے دعوت پر اپنی اپنی جماعتوں سے مشاورت کے لیے وقت مانگ لیا ہے۔