مرحبا رمضان! سعودی عرب، خلیجی ممالک اور افغانستان میں آج پہلا روزہ

سعودی عرب، خلیجی ممالک اور افغانستان میں ماہ رمضان المبارک کا آغاز ہو گیا ہے اور آج پہلا روزہ رکھا گیا۔ گزشتہ رات مسجد الحرام اور مسجد نبوی میں پہلی تراویح کے روح پرور مناظر دیکھے گئے، جہاں ہزاروں مسلمان بارگاہ الہٰی میں سجدہ ریز ہو کر شکر اور مغفرت کی دعائیں مانگ رہے تھے۔

عراق، عمان، ترکی، انڈونیشیا اور ملائیشیا میں پہلا روزہ کل رکھا جائے گا، جبکہ وسطی ایشیائی ممالک آذربائیجان، قازقستان، کرغزستان اور ازبکستان میں رمضان کا آغاز جمعرات سے ہوگا۔ بنگلا دیش، بھارت، جاپان، سنگاپور، آسٹریلیا اور فرانس میں بھی کل پہلا روزہ ہوگا۔پاکستان میں رمضان المبارک کا چاند دیکھنے کے لیے مرکزی رویت ہلال کمیٹی کا اہم اجلاس آج پشاور میں ہوگا، جس کی صدارت چیئرمین مرکزی رویت ہلال کمیٹی مولانا عبد الخبیر آزاد کریں گے۔ ملک بھر میں زونل رویت ہلال کمیٹیوں کے اجلاس بھی منعقد ہوں گے، جہاں سے چاند کی شہادتیں موصول ہوں گی۔محکمہ موسمیات اور متعلقہ ماہرین کے مطابق ملک کے مختلف علاقوں میں چاند دیکھنے کے قوی امکانات ہیں، جس کے بعد رمضان المبارک کا باقاعدہ اعلان کیا جائے گا۔