ملک بھر میں بارش اور برفباری کی پیشگوئی، سردی کی شدت میں اضافے کا امکان

ملک کے بیشتر علاقوں میں آج بارش کا امکان ہے جبکہ شمالی بلوچستان، خیبر پختونخوا، کشمیر اور گلگت بلتستان میں بارش کے ساتھ برفباری متوقع ہے۔

محکمہ موسمیات کے مطابق وفاقی دارالحکومت اسلام آباد میں تیز ہواؤں اور گرج چمک کے ساتھ بارش کا امکان ہے۔ خیبر پختونخوا کے اضلاع چترال، دیر، سوات، شانگلہ، کوہستان، بٹگرام، ایبٹ آباد، پشاور اور کوہاٹ میں بارش اور بالائی علاقوں میں برفباری متوقع ہے۔

پنجاب کے بیشتر اضلاع میں موسم سرد اور مطلع ابر آلود رہنے کا امکان ہے۔ مری اور گلیات میں بارش اور برفباری جبکہ راولپنڈی، اٹک، چکوال، جہلم، سرگودھا، گجرات، بھکر اور خوشاب میں بارش کی پیشگوئی کی گئی ہے۔ لاہور، سیالکوٹ، گوجرانوالہ، فیصل آباد، نارووال اور لیہ میں بھی بارش کا امکان ہے۔

سندھ کے بیشتر اضلاع میں موسم سرد اور مطلع جزوی ابر آلود رہنے کی توقع ہے، تاہم سکھر، روہڑی اور شکارپور میں بارش ہو سکتی ہے۔

ادھر بلوچستان کے بیشتر اضلاع میں بارش جبکہ پہاڑی علاقوں میں برفباری کا امکان ہے۔ اسی طرح کشمیر اور گلگت بلتستان میں وقفے وقفے سے بارش اور برفباری کی پیشگوئی کی گئی ہے، جس کے باعث سردی کی شدت میں مزید اضافہ متوقع ہے۔