رحیم یارخان میں پولیس مقابلہ، سنگین وارداتوں میں ملوث ڈاکو زخمی حالت میں گرفتار

رحیم یار خان کے علاقے تھانہ ایئرپورٹ کی حدود میں پولیس اور جرائم پیشہ عناصر کے درمیان فائرنگ کا شدید تبادلہ ہوا ہے، جس کے نتیجے میں ایک بدنام زمانہ ڈاکو زخمی حالت میں گرفتار کر لیا گیا ہے۔ پولیس ترجمان کے مطابق، پولیس پارٹی نے چک 106 پی سیم نالہ روڈ پر ناکہ بندی کے دوران مشکوک موٹر سائیکل سواروں کو رکنے کا اشارہ کیا، جس پر موٹر سائیکل پر سوار مسلح ڈاکوؤں نے پولیس پر اندھا دھند فائرنگ شروع کر دی۔ پولیس کی جوابی کارروائی اور فائرنگ کے تبادلے کے بعد ایک ڈاکو کو زخمی حالت میں دھر لیا گیا، جس کی شناخت سنگین وارداتوں میں ملوث بدنام زمانہ فیضان عرف شانا مانک کے نام سے ہوئی ہے۔ پولیس نے گرفتار ملزم کے قبضے سے ناجائز اسلحہ برآمد کر لیا ہے اور ریکارڈ کی پڑتال پر معلوم ہوا ہے کہ وہ ڈکیتی، چوری اور راہزنی کے متعدد سنگین مقدمات میں مطلوب تھا۔ پولیس نے مفرور ڈاکوؤں کی گرفتاری کے لیے علاقے کا محاصرہ کر کے بڑے پیمانے پر سرچ آپریشن کا آغاز کر دیا ہے۔