رحیم یار خان: بے نظیر انکم سپورٹ سنٹر کی چھت گرنے سے 5 خواتین جاں بحق، 55 زخمی

رحیم یار خان کے نواحی علاقے چک نمبر 125 میں ایک دلخراش واقعہ پیش آیا ہے جہاں بے نظیر انکم سپورٹ پروگرام (BISP) کی رقم وصول کرنے کے لیے جمع ہونے والی خواتین پر ریٹیلر شاپ کی چھت گر گئی۔ ریسکیو حکام کے مطابق، حادثے کے وقت دکان کی چھت پر 200 سے زائد خواتین موجود تھیں، جو بوجھ برداشت نہ کر سکی اور اچانک زمین بوس ہو گئی۔ اس افسوسناک حادثے میں 5 خواتین جان کی بازی ہار گئی ہیں جبکہ 55 سے زائد زخمی ہیں۔

واقعے کی اطلاع ملتے ہی ریسکیو ٹیموں نے امدادی کارروائیاں شروع کیں اور ملبے تلے دبی خواتین کو نکال کر فوری طور پر شیخ زید ہسپتال منتقل کیا۔ ضلعی انتظامیہ نے ہسپتال میں ایمرجنسی نافذ کر دی ہے تاکہ زخمیوں کو بروقت طبی امداد فراہم کی جا سکے۔ ابتدائی تحقیقات کے مطابق چھت کی تعمیر کمزور تھی جو خواتین کے غیر معمولی رش کی وجہ سے گر گئی۔ انتظامیہ نے واقعے کی مکمل تحقیقات کا حکم دے دیا ہے۔