سیکیورٹی خدشات: کوئٹہ سے ٹرین سروس ایک دن کے لیے معطل، جعفر اور بولان ایکسپریس آج روانہ نہیں ہوں گی

سیکیورٹی خدشات کے پیش نظر کوئٹہ سے ملک کے مختلف شہروں کے لیے ٹرین سروس ایک دن کے لیے معطل کر دی گئی ہے۔ ریلوے حکام کے مطابق کوئٹہ سے راولپنڈی کے لیے جعفر ایکسپریس اور کراچی کے لیے بولان ایکسپریس آج اپنی منزلوں کے لیے روانہ نہیں ہوں گی۔

ریلوے حکام کا کہنا ہے کہ موجودہ سیکیورٹی صورتحال کا جائزہ لینے اور مسافروں کے تحفظ کو یقینی بنانے کے لیے یہ فیصلہ کیا گیا ہے۔ تاہم حکام کے مطابق ٹرین سروس کی معطلی عارضی ہے اور بحالی کا شیڈول جاری کر دیا گیا ہے۔

ریلوے حکام کے مطابق جعفر ایکسپریس 26 دسمبر کو اپنے مقررہ وقت پر کوئٹہ سے راولپنڈی کے لیے روانہ ہوگی، جبکہ بولان ایکسپریس 29 دسمبر کو کوئٹہ سے کراچی کے لیے دوبارہ اپنی سروس شروع کرے گی۔

حکام نے مسافروں سے اپیل کی ہے کہ وہ سفر سے قبل ریلوے سے تازہ صورتحال کی تصدیق ضرور کریں۔