کوئٹہ میں گراں فروشوں کے خلاف کریک ڈاؤن، 43 افراد گرفتار

بلوچستان کے دارالحکومت کوئٹہ میں ضلعی انتظامیہ نے گراں فروشی اور سرکاری نرخ نامے کی خلاف ورزی کرنے والوں کے خلاف سخت کریک ڈاؤن کرتے ہوئے 43 نان بائیوں اور قصائیوں کو گرفتار کر کے جیل منتقل کر دیا ہے۔ ضلعی انتظامیہ کے مطابق یہ کارروائیاں سرکی روڈ، کاسی روڈ، طوغی روڈ، اور سریاب روڈ سمیت شہر کے مختلف علاقوں میں کی گئیں، جہاں تندوروں اور گوشت کی دکانوں کی ناگہانی جانچ پڑتال کی گئی۔ انتظامیہ نے واضح کیا ہے کہ شہریوں کو مقررہ وزن کے مطابق روٹی اور سرکاری نرخوں پر معیاری گوشت کی فراہمی ہر صورت یقینی بنائی جائے گی اور قانون کی خلاف ورزی کرنے والے عناصر کے خلاف بلاامتیاز کارروائیوں کا یہ سلسلہ آئندہ بھی جاری رہے گا۔