قطر کی ایران کیخلاف کسی بھی فوجی کارروائی میں شرکت سے متعلق خبروں کی تردید

قطر نے ایران کے خلاف کسی بھی قسم کی فوجی کارروائی میں شرکت سے متعلق اسرائیلی میڈیا کی رپورٹس کو یکسر مسترد کرتے ہوئے انہیں مکمل طور پر بے بنیاد قرار دے دیا ہے۔ قطر کے انٹرنیشنل میڈیا آفس کی جانب سے جاری کردہ ایک ہنگامی بیان میں کہا گیا ہے کہ اسرائیلی ذرائع ابلاغ کی یہ رپورٹس من گھڑت اور گمراہ کن ہیں جن میں دعویٰ کیا گیا تھا کہ قطر نے ایران پر حملے یا کسی فوجی اقدام میں حصہ لینے پر رضامندی ظاہر کی ہے۔

قطری حکام نے اپنے بیان میں واضح کیا کہ ریاستِ قطر ایسی کسی بھی گمراہ کن معلومات کو اپنے فعال سفارتی کردار اور خطے میں جاری امن کوششوں کو سبوتاژ کرنے کی اجازت نہیں دے گی۔ ترجمان کا مزید کہنا تھا کہ قطر خطے میں بڑھتی ہوئی کشیدگی کو کم کرنے اور موجودہ تنازعات کے پرامن و سفارتی حل کے لیے اپنی مخلصانہ کوششیں مسلسل جاری رکھے ہوئے ہے اور اس موقف پر مضبوطی سے قائم ہے۔