سربراہ سنی تحریک ثروت اعجاز قادری کے گھر چھاپہ، بھتہ خوری نیٹ ورک سے جڑے ملزمان گرفتار

کراچی کے علاقے ناظم آباد میں سی آئی اے پولیس نے سربراہ پاکستان سنی تحریک انجینئر ثروت اعجاز قادری کے گھر (قادری ہاؤس) پر چھاپہ مارا، جس کے دوران بھتہ خوری میں ملوث مطلوب ملزمان کو گرفتار کر لیا گیا۔

پولیس حکام کے مطابق کارروائی بھتہ خوری میں ملوث تین ملزمان کی گرفتاری کے لیے کی گئی، جن کی نشاندہی پہلے سے گرفتار ملزم ریحان نے کی تھی۔ چھاپے کے دوران جواد قادری اور شاہزیب سمیت متعدد افراد کو حراست میں لیا گیا، جبکہ اسلحہ، گولیاں اور میگزین بھی برآمد کیے گئے۔

ایس ایس پی محمد عمران خان کے مطابق گرفتار ملزمان بھتہ خور گروہ کے سرغنہ صمد کاٹھیاواڑی اور وصی اللہ لاکھو کے نیٹ ورک سے منسلک تھے اور پولیس کو مختلف مقدمات میں مطلوب تھے۔ حکام کا کہنا ہے کہ زیرِ حراست افراد سے تفتیش جاری ہے۔

دوسری جانب مرکزی ترجمان پاکستان سنی تحریک نے پولیس کارروائی کی مذمت کرتے ہوئے دعویٰ کیا کہ چھاپے کے دوران انجینئر ثروت اعجاز قادری سمیت 20 سے زائد ذمہ داران کو گرفتار کیا گیا اور قادری ہاؤس کے سیکیورٹی کیمرے بھی توڑ دیے گئے۔