یوکرین جنگ کے خاتمے کیلئے پیوٹن سنجیدہ، امن بات چیت آخری مرحلے میں: ٹرمپ

امریکی صدر ڈونلڈ ٹرمپ نے کہا ہے کہ روسی صدر ولادیمیر پیوٹن یوکرین سے جاری جنگ کے خاتمے کے لیے انتہائی سنجیدہ ہیں اور امن کی جانب عملی پیش رفت چاہتے ہیں۔

فلوریڈا میں یوکرینی صدر ولودیمیر زیلنسکی سے ملاقات سے قبل امریکی صدر نے روسی ہم منصب ولادیمیر پیوٹن سے ٹیلیفونک گفتگو کی۔ صدر ٹرمپ کے مطابق دونوں رہنماؤں کے درمیان 75 منٹ طویل بات چیت ہوئی، جس کے بعد انہیں یقین ہوگیا کہ روس جنگ کے خاتمے کے لیے تیار ہے۔

صحافیوں سے گفتگو کرتے ہوئے ڈونلڈ ٹرمپ کا کہنا تھا کہ یوکرین جنگ سے متعلق امن مذاکرات اپنے آخری مراحل میں داخل ہو چکے ہیں اور اس حوالے سے پیش رفت تیزی سے جاری ہے۔

امریکی صدر نے مزید کہا کہ یوکرین اور روس دونوں ہی جنگ کے خاتمے کے خواہاں ہیں، اور وہ صدر زیلنسکی سے ملاقات کے بعد ایک بار پھر ولادیمیر پیوٹن سے رابطہ کریں گے۔

واضح رہے کہ اس سے قبل اکتوبر میں بھی ڈونلڈ ٹرمپ کی یوکرینی صدر زیلنسکی سے ملاقات ہوئی تھی، جس کے بعد ٹرمپ کا کہنا تھا کہ مجوزہ امن معاہدے کی کوئی حتمی ڈیڈ لائن مقرر نہیں، تاہم یہ معاہدہ یوکرین کے لیے بڑے معاشی فوائد کا باعث بن سکتا ہے۔