صدر پیوٹن کی رہائش گاہ پر یوکرینی ڈرون حملہ ناکام، روسی فضائی دفاع نے 91 ڈرونز تباہ کر دیے

روسی وزیرِ خارجہ نے دعویٰ کیا ہے کہ روسی فوج نے صدر ولادیمیر پیوٹن کی رہائش گاہ کو نشانہ بنانے کی یوکرینی کوشش ناکام بنا دی۔ ان کے مطابق روسی فضائی دفاعی نظام نے بروقت کارروائی کرتے ہوئے حملے کو مکمل طور پر ناکام بنایا۔

روسی وزیرِ خارجہ کے مطابق یہ واقعہ 29 دسمبر کی شب روس کے نووگورود کے علاقے میں پیش آیا، جہاں یوکرین کی جانب سے 91 ڈرونز داغے گئے۔ بیان میں کہا گیا ہے کہ تمام ڈرونز کو فضا میں ہی تباہ کر دیا گیا اور کسی بھی قسم کا نقصان نہیں ہوا۔

روسی حکام کا کہنا ہے کہ حملے کے دوران صدر پیوٹن کی رہائش گاہ محفوظ رہی اور سیکیورٹی صورتحال مکمل طور پر کنٹرول میں رہی۔

روسی وزیرِ خارجہ نے مزید کہا کہ اس واقعے کے بعد کیف کے ساتھ مذاکراتی حکمتِ عملی پر دوبارہ غور کیا جائے گا، کیونکہ اس نوعیت کے حملے کشیدگی میں اضافے کا باعث بن رہے ہیں۔

دوسری جانب کریملن نے صدر پیوٹن اور امریکی صدر ڈونلڈ ٹرمپ کے درمیان ہونے والی ٹیلی فونک گفتگو کی تفصیلات بھی جاری کر دی ہیں۔ صدر پیوٹن نے امریکی صدر کو اپنی رہائش گاہ پر ہونے والے یوکرینی ڈرون حملے سے آگاہ کیا اور کہا کہ روس امن کے قیام کے لیے امریکا کے ساتھ تعاون جاری رکھنے کا خواہاں ہے۔

کریملن کے مطابق صدر ٹرمپ صدر پیوٹن کی رہائش گاہ پر حملے کی خبر سن کر چونک گئے اور کہا کہ اس ڈرون حملے کے اثرات امریکا کے رویے اور یوکرینی صدر زیلنسکی کے ساتھ تعلقات پر بھی پڑ سکتے ہیں۔