پنجاب یونیورسٹی گراؤنڈ میں کھیل کے دوران جھگڑے میں نوجوان جاں بحق

پنجاب یونیورسٹی کے فٹبال گراؤنڈ میں کھیل کے دوران لڑکوں کے درمیان ہونے والے جھگڑے میں ایک نوجوان مکے اور لاتیں لگنے سے جاں بحق ہو گیا ہے۔

عینی شاہدین کے مطابق یونیورسٹی گیسٹ ہاؤس سے ملحقہ فٹبال گراؤنڈ میں نوجوان فٹبال کھیل رہے تھے کہ اسی دوران کسی بات پر ان کے درمیان تلخ کلامی ہوئی۔ یہ تلخ کلامی دیکھتے ہی دیکھتے شدید جھگڑے میں تبدیل ہو گئی اور لڑکوں نے ایک دوسرے پر مکے اور لاتیں برسانا شروع کر دیں۔ اس دوران ایک نوجوان کے سر پر شدید چوٹ لگی، جو اتنی گہری تھی کہ وہ موقع پر ہی دم توڑ گیا۔

ذرائع کے مطابق جاں بحق ہونے والے نوجوان کی شناخت ریحان گل کے نام سے ہوئی ہے، جو پنجاب یونیورسٹی کے آفیسر محمد یعقوب کا بیٹا تھا۔ واقعے کے فوری بعد یونیورسٹی انتظامیہ اور قانون نافذ کرنے والے اداروں کو مطلع کیا گیا۔ پولیس نے موقع پر پہنچ کر شواہد اکٹھے کر لیے ہیں اور واقعے کی باقاعدہ تحقیقات شروع کرتے ہوئے جھگڑے میں ملوث افراد کے خلاف قانونی کارروائی کا آغاز کر دیا ہے۔