کوپ 30 : پنجاب پہلی بار بطور مبصر نہیں باقاعدہ شریک ہوگا، مریم نواز

وزیراعلیٰ پنجاب مریم نواز شریف نے کہا ہے کہ پنجاب پہلی مرتبہ عالمی ماحولیاتی کانفرنس کوپ 30 میں بطور مبصر نہیں بلکہ باقاعدہ شریک ہو رہا ہے، جہاں پنجاب کے منصوبے دنیا کے سامنے پیش کیے جائیں گے۔

برازیل روانگی سے قبل لندن میں میڈیا سے گفتگو کرتے ہوئے مریم نواز شریف نے کہا کہ پنجاب میں ماحولیات، سیاحت اور وائلڈ لائف کے شعبوں میں نمایاں بہتری کے اقدامات کیے گئے ہیں، جبکہ سموگ کے خاتمے کے لیے کیے گئے اقدامات کو عالمی سطح پر تسلیم کیا جا رہا ہے۔

انہوں نے کہا کہ ستھرا پنجاب دنیا کا منظم ویسٹ مینجمنٹ پروگرام ہے، صوبے میں الیکٹرک بسیں اور الیکٹرک بائیکس متعارف کرا دی گئی ہیں، اور ٹرانسپورٹ نظام کو بتدریج گرین انرجی پر منتقل کیا جا رہا ہے۔

وزیراعلیٰ مریم نواز شریف نے کہا کہ پنجاب کے عوام کی طرف سے بے پناہ محبت ملی ہے جس کی توقع نہیں تھی، حکومت ٹیم ورک کے طور پر کام کر رہی ہے جس کے مثبت نتائج عوامی سطح پر نظر آ رہے ہیں۔

انہوں نے مزید کہا کہ شہباز شریف میرے مینٹور ہیں، انہوں نے میری تربیت کی اور میں انہی کے نقشِ قدم پر چل رہی ہوں۔ اللہ تعالیٰ کا شکر ہے کہ وزارتِ اعلیٰ میں کوئی دشواری پیش نہیں آئی۔

وزیراعلیٰ مریم نواز شریف برازیل کے شہر بیلم میں منعقد ہونے والی کوپ 30 ماحولیاتی کانفرنس میں پاکستان اور پنجاب کی نمائندگی کریں گی۔