پنجاب میں ریکارڈ کم ٹرن آؤٹ نے الیکشن پر عوامی عدم اعتماد واضح کر دیا، بیرسٹر گوہر

تحریک انصاف کے چیئرمین بیرسٹر گوہر نے ضمنی انتخابات میں پنجاب بھر میں ریکارڈ کم ٹرن آؤٹ پر ردعمل دیتے ہوئے کہا ہے کہ آج کے نتائج نے عوام کے الیکشن پر عدم اعتماد کو واضح کر دیا ہے۔ ان کا کہنا تھا کہ صوبے کی تاریخ میں اس قدر کم ٹرن آؤٹ پہلے کبھی دیکھنے میں نہیں آیا۔

بیرسٹر گوہر کا کہنا تھا کہ صاف اور شفاف الیکشن کرانا الیکشن کمیشن کی بنیادی ذمہ داری ہے۔ “ہم جمہوریت اور عوامی سیاست پر یقین رکھتے ہیں، ہمارے پاس موجود نمبرز کے مطابق ہم پنجاب میں لیڈ کر رہے ہیں۔”

انہوں نے کہا کہ پی ٹی آئی دھاندلی کے بیانیے پر نہیں بلکہ عوامی قوت پر یقین رکھتی ہے، اور آج کے ضمنی انتخابات دراصل ایک ویک اپ کال ہیں۔

بیرسٹر گوہر نے مزید کہا کہ ہری پور میں لیول پلیئنگ فیلڈ موجود تھی جہاں تمام جماعتوں نے جلسے اور ریلیاں کیں، لیکن پنجاب میں پی ٹی آئی نے انتخابات کا بائیکاٹ کیا کیونکہ وہاں پارٹی کو جلسوں، جلوسوں اور انتخابی مہم کی اجازت نہیں ملی۔

این اے 18 ہری پور کے نتائج پر اعتراض اٹھاتے ہوئے بیرسٹر گوہر نے دعویٰ کیا کہ “جو نتائج دکھائے جا رہے ہیں وہ حقیقت پر مبنی نہیں ہیں۔”