گلگت بلتستان انتخابات، پنجاب پولیس کے 5 ہزار اہلکار تعینات کیے جائیں گے

لاہور: گلگت بلتستان کے انتخابات کے سلسلے میں پنجاب پولیس نے پانچ ہزار سے زائد اہلکاروں کو انتخابی ڈیوٹی پر بھیجنے کا فیصلہ کر لیا ہے۔

پولیس حکام کے مطابق پنجاب پولیس کی نفری چار جون کو گلگت بلتستان روانہ ہوگی، جہاں اہلکار انتخابی عمل کے دوران سکیورٹی اور امن و امان کی صورتحال برقرار رکھنے کے فرائض انجام دیں گے۔

حکام کا کہنا ہے کہ بھیجی جانے والی نفری میں ریزرو پولیس سے ایک ہزار پانچ سو، پنجاب کانسٹیبلری سے ایک ہزار دو سو بیالیس جبکہ پنجاب ہائی وے پولیس سے ایک ہزار نو سو اٹھاون اہلکار شامل ہوں گے۔

پولیس کے مطابق لاہور پولیس کے تین سو اہلکار بھی گلگت بلتستان جانے والی نفری کا حصہ ہوں گے۔ انتخابی عمل کے دوران سکیورٹی کے جامع انتظامات کو یقینی بنانے کے لیے اہلکاروں کی تعیناتی عمل میں لائی جا رہی ہے۔